Aðgerðir gegn ágengum plöntum í Stykkishólmi ganga ágætlega og er lúpínuslætti að ljúka. Fyrstu yfirferð á skógarkerfil og spánarkerfil er lokið nema í örfáum tilfellum þar sem ekki fékkst leyfi til að fara inn í garða. Sömuleiðis vantar enn leyfi nokkurra garðeigenda til að fjarlægja
bjarnarkló og lúpínu.

Að kvöldi 21. júní síðastliðinn komu íbúar við Ytri-Höfða saman og slógu lúpínu. Þátttakan var góð og gekk slátturinn frábærlega í veðurblíðu.

Yfirbragð höfðans breyttist mikið við sláttinn. Eiga íbúarnir hrós skilið fyrir að eiga frumkvæði að aðgerðum sveitarfélagsins gegn ágengum plöntum og að leggja vinnu sína í aðgerðirnar.

Lúpínuslætti er nú lokið ef frá er talið skógræktarsvæðið við Grensás. Skógræktarfélag Stykkishólms er með ásana í austanverðu bæjarlandinu á leigu frá Stykkishólmsbæ. Samkomulag um að uppræta lúpínu þar tókst ekki að þessu sinni en verkefnið fær til umráða eina stóra breiðu á því svæði til að framkvæma samanburðartilraun á áhrifum eiturs og sláttar. Sá hluti breiðunnar sem ekki verður nýttur í tilraunina verður sleginn og er gert ráð fyrir að þeim slætti ljúki í vikunni. Að því loknu snýr hópurinn sér aftur að bjarnarkló og kerflum.

Þrír starfsmenn vinna í fullu starfi við aðgerðirnar en auk þeirra eru hér nú staddir fimm sjálfboðaliðar frá sjálfboðaliðasamtökunum SEEDS www.seedsiceland.org.

Smellið á myndirnar til að sjá þær stærri

Bjössi málari vígalegur með orfið	Lúpína slegin í tilraunareit
Lúpína slegin í tilraunareit	Lúpína slegin við göngustíg
Lúpínan þakti höfðann á stórum svæðum	Lúpínubreiðurnar eru stórar á tilraunasvæðinu
Lúpínutilraunareitir eru afmarkaðir með stikum og snæri	Tilraunareitir stikaðir
Slegið af miklum móð	Stykkishólmsbær bauð upp á veitingar