Fyrir tæpu ári síðan varð uppvíst um skemmdarverk á arnarhreiðri í eyju á sunnanverðum Breiðafirði, eins og sagt var frá ífrétt á síðunni. Þar hafði ungt arnarpar búið sig undir varp en ekkert varð úr því vegna skemmda sem unnar voru á hreiðrinu.
Ánægjulegt er að sjá að þetta virðist ekki hafa hindrað parið í að reyna aftur og hefur það nú byggt nýjan hreiðurlaup og virðist ætla að gera aðra tilraun til varps.
Að þessu sinni munu ýmsir aðilar fylgjast vandlega með hreiðrinu úr landi og af sjó til að reyna að koma í veg fyrir að parið verði aftur fyrir truflun. Einnig er í skoðun að setja upp vöktunarmyndavél í nágrenni við hreiðrið.