Náttúrustofa Vesturlands hefur tekið þátt í vöktun íslenska arnarstofnsins frá árinu 2001. Í henni felst m.a. að fylgjast með varpárangri arnarpara og merkja arnarunga.

Á síðari árum hefur ljósmyndun orðið sífellt mikilvægari þegar hreiður eru heimsótt til að merkja ungana. Er þá reynt að ná ljósmyndum af fótum fullorðnu fuglanna til að greina hvort þeir séu merktir og ef svo er, hvað stendur á merkinu. Slíkar upplýsingar bæta miklu við þekkingu okkar á lífssögu arnarins.

Umferð innan við 500 metra frá arnarhreiðrum er stranglega bönnuð nema með leyfi umhverfis- og auðlindaráðherra eða Umhverfisstofnunar.