Eftirfarandi frétt birtist í héraðsfréttablaðinu Skessuhorni

Náttúrustofa Vesturlands hefur ráðið nýjan starfsmann til að sinna EarthCheck umhverfisvottunarverkefni sveitarfélaganna fimm á Snæfellsnesi. Það er líffræðingurinn Birna Heide Reynisdóttir, sem undanfarið hefur unnið sem sérfræðingur í Þjóðgarðinum Snæfellsjökli og er í meistaranámi í umhverfisstjórnun meðfram starfi. Hún flyst til Stykkishólms og mun hefja störf á Náttúrustofunni 1. október nk. Valið stóð á milli ellefu vel menntaðra umsækjenda og varð þetta niðurstaðan eftir ítarlegt ráðningarferli, segir í tilkynningu frá Náttúrustofu Vesturlands.