This slideshow requires JavaScript.

Snörp veðraskipti hafa mögulega haft neikvæð áhrif á ýmsa fugla. Hrafn og haftyrðill þurftu á aðstoð manna að halda í Stykkishólmi í dag. Ólíklegt er að einskær tilviljun hafi ráðið því að þetta gerðist einmitt í dag, þegar snöggkólnaði eftir langvarandi bleytu- og hlýindaskeið. Hrafninn kom sjálfur í garð starfsfólks Náttúrustofunnar og sýndi sig á meðan setið var að snæðingi í hádegishléinu. Hann var máttfarinn og ófleygur og dvelur nú í arnabúri Náttúrustofunnar í góðu yfirlæti. Hann étur vel og hressist vonandi fljótt. Haftyrðillinn hafði fokið upp á land og í ógöngur og þurfti aðstoð við að koma sér til sjávar aftur. Athugull Hólmari varð hans var og kom til Náttúrustofunnar. Honum var sleppt við sjóinn eftir að ástandsskoðun leiddi ekkert óeðlilegt í ljós.