Hrönn Egilsdóttir hélt fyrirlestur í fyrirlestraröð NSV miðvikudaginn 15. febrúar. Var þetta annar fyrirlesturinn í röðinni og bar hann heitið Fiskurinn, fæðan og súrnun hafsins.

Erindið sem Hrönn flutti var í samstarfi við Stykkishólmshöfn og fjallaði um manngerða súrnun hafsins og þá ógn sem lífríkinu stafar af henni. Stiklað var á stóru um stöðu þekkingar á áhrifum súrnunar hafsins á fiska, fæðuna þeirra og ýmsar aðrar lífverur hafsins.

Súrnun hafsins kemur til með losun á CO2. Þegar styrkur CO2 eykst í andrúmsloftinu tekur sjórinn nefnilega hluta þeirrar aukningar til sín en við það breytist sýrustigið.

Þegar hafa komið fram afleiðingar á lífríkinu, t.d. í ostrurækt. Áhrif á fiska gætu orðið mest í gegnum fæðukeðjur en súrnunin getur einnig haft bein áhrif á lirfu- og ungseiðastig fiska.

Súrnun hafsins gæti verið ein allra stærsta umhverfisógnin sem við stöndum frammi fyrir í dag. Maðurinn treystir á hafið sem fæðuuppsprettu og vegna mikilvægi sjávarútvegsins fyrir Ísland ættu Íslendingar að vera í fararbroddi þegar kemur að varnaraðgerðum.